Joriy yilning 3-iyun kuni O‘zbekiston kasaba uyushmalari Federatsiyasining Farg‘ona viloyat Kengashida “Ayollar daftari”ning 7-bosqichida xotin-qizlarga amaliy yordam ko‘rsatish ishlarini tashkil qilish bo‘yicha kengaytirilgan yig‘ilishi bo‘lib o‘tdi.

Yig‘ilishda O‘zbekiston Respublikasi Oliy Majlis Senati a’zosi Ma’rufova Gulnora Mahmudovna, O‘zbekiston kasaba uyushmalari Federatsiyasidan Farg‘ona viloyatiga biriktirilgan mas’ul rahbar Salixov Abdugʻappar Muxtarovich, viloyat hokimi o‘rinbosarlari, viloyat shtabi a’zolari, tuman, shahar hokimlarining xotin-qizlar masalalari bo‘yicha o‘rinbosarlari va kasaba uyushmalaridan hududlarga biriktirilgan mas’ul xodimlar ishtirok etdilar.

Kengaytirilgan yig‘ilishda “Ayollar daftari” tizimining 7-bosqichida Farg‘ona viloyatida 112 mingdan ortiq xotin-qizlarga yangi turdagi amaliy yordamlarni ko‘rsatish masalalari muhokama etildi.

Ta’kidlanganidek, 2021-yildan buyon muhtaram Prezidentimiz Shavkat Mirziyoyev tashabbuslari bilan joriy etilgan “Ayollar daftari” tizimining 6 ta bosqichi orqali shu paytgacha viloyat bo‘yicha jami 512 ming 863 nafardan ziyod ehtiyojmand xotin-qizlarga amaliy yordamlar berildi.

Yig‘ilishda yangi tahrirdagi “Ayollar daftari” nizomida yana 6 ta turdagi qo‘shimcha yordamlar nazarda tutilgani, ushbu yordamlar toifasidan qat’iy nazar “Ayollar daftari”ga kiritilgan barcha xotin-qizlarga ko‘rsatilishi mumkinligi  tushuntirib o‘tildi.

Qayd etilganidek, yangi tahrirdagi “Ayollar daftari” nizomining asosiy maqsadi ehtiyojmand xotin-qizlarga shunchaki bir marta yordam berish emas, balki ularning doimiy daromad manbaiga ega bo‘lishi va kambag‘allikdan xalos bo‘lishiga ko‘maklashishdan iboratdir.

Kengaytirilgan yig‘ilishda “Ayollar daftari” tizimini yuritishning yangi tartibi qadamma-qadam tushuntirib berildi va vazifalarni yuqori saviyada amalga oshirishni ta’minlash borasida mutasaddi va mas’ullar ham o‘z taklif va mulohazalarini bildirdilar.

Yig‘ilish yakunida Prezidentimiz tashabbuslari bilan amalga kiritilgan “Ayollar daftari” tizimi doirasida amalga oshirilayotgan ezgu ishlar millionlab opa-singillarimiz va ularning oilalari turmush sharoitlarini yanada yaxshilash, ularning hayotiga yorug‘lik va rozilik olib kirishga qaratilgani, buning uchun barcha mas’ullar bor imkoniyatlarni ishga solishi va yakdillik bilan ish olib borishi zarurligi ta’kidlandi.

O‘zbekiston kasaba uyushmalari Federatsiyasining Farg‘ona viloyati Kengashi