Ilg‘or fikrli xodim

O‘zbekiston kasaba uyushmalari Federatsiyasining Farg‘ona viloyati Kengashi tashkiliy ishlar bo‘limi mudiri Abror Otaboyev O‘zbekiston mahallalar uyushmasi tomonidan o‘tkazilgan “Siz huquqingizni bilasizmi?” Respublika ko‘rik-tanlovida ishtirok etib, g‘oliblar safidan o‘rin egalladi.  

Ushbu tanlov O‘zbekiston Respublikasi Prezidentining Farmoniga muvofiq o‘tkazildi. Unda barcha viloyatlardan o‘z bilimiga ishongan ishtirokchilar qatnashdi. 

Fuqarolarning shaxsiy huquqlari, majburiyatlari, yangi tahrirdagi konstitutsiyada mahallaga oid normalar tanlovning asosiy shartlaridan bo‘ldi. 

Tanlov qatnashchilariga 25 ta test savollari berildi. Savollarga tez va to‘g‘ri javob topgan Abror Otaboyev tanlov g‘olibi bo‘ldi. Shu o‘rinda aytish lozimki, hayotda ham izlanuvchan va intilishdan to‘xtamaydigan Abror Otaboyev kasaba uyushmalari faoliyatini jonlantirishda o‘zining munosib hissasini qo‘shiq kelmoqda. 

Ayniqsa, uning boshlang‘ich tashkilotlar faoliyatini yanada jonlantirish, yetakchilarning malakasini oshirish bo‘yicha seminar mashg‘ulotlari boshlang‘ich kasaba uyushmalar faoliyatini yangi bosqichga olib chiqayotgani bilan tahsinga loyiq.

Doimo izlanish va yangilikka intilish bilan andarmon bo‘lgan lavhamiz qahramoni, bir zum bo‘lsa-da tinim bilmaydi. Hamisha yangi g‘oyalar, loyihalar ustida bosh qotiradi. Xususan, shu kunlarda ham O‘zbekiston kasaba uyushmalari Federatsiyasining Farg‘ona viloyati Kengashi raisi tashabbusi va qo‘llab-quvvatlashi bilan A.Otaboyevning sa’y-harakati tufayli “Eng yaxshi boshlang‘ich kasaba uyushma tashkiloti” ko‘rik-tanlovi o‘tkazilmoqda.

Boshlang‘ich kasaba uyushma tashkilotlari faoliyatini ommalashtirish, Jamoa shartnomalari orqali ishchi-xodimlarga yanada qulay sharoitlar yaratish maqsadida tashkil etilgan ushbu tanlovda 300 dan ziyod boshlang‘ich tashkilotlar mehnat jamoalarida kasaba uyushmaning o‘rni va ahamiyati yuksakligini aks ettirgan taqdimotlari bilan ishtirok etmoqda. 

Ha, kishida ishga bo‘lgan mas’uliyat va vatanparvarlik tuyg‘ulari jo‘sh uraversa, albatta, natija ham kutilganidek bo‘ladi. A.Otaboyevdek uyg‘oq va ilg‘or fikrli xodimlar bor ekan tashkilotning nufuzi ham yuksalaveradi.

Shohsulton To‘xtamatov,

jurnalist.