Байрам табриги

Ўзбекистон Касаба уюшмалари Федерациясининг Фарғона вилоят Кенгаши раисининг соҳа ходимларига байрам табриги!

Ҳурматли юртдошлар!
Азиз деҳқонлар, фермер-томорқачилар!
Қадрли қишлоқ хўжалиги соҳасининг жонкуярлари ва фахрийлари!

Бугунги кунда муҳтарам Юртбошимиз томонидан фермер хўжаликлари ва умуман, қишлоқ хўжалиги соҳаси ҳар томонлама қўллаб-қувватланиб, уларга барча зарур шароит ва имкониятлар яратиб берилмоқда. Янги Ўзбекистон стратегиясида барча соҳалар қатори қишлоқ хўжалигини ҳам модернизация қилиш борасида энг муҳим вазифаларни аниқ белгиланиб, уларни изчил амалга оширилаётгани соҳадаги улкан муваффақиятларга асос бўлиб хизмат қилмоқда.

Жамиятимизда ҳар қандай соҳа вакили эътибордан четда қолаётгани йўқ, десак адашмаган бўламиз. Президентимиз Шавкат Мирзиёевнинг ташаббуслари билан декабрь ойининг иккинчи якшанбаси “Ўзбекистон Республикаси қишлоқ хўжалиги ходимлари куни” этиб белгиланди. Айни пайтда қишлоқ хўжалиги ходимлари бу кунни катта шодиёна билан нишонлашмоқдалар.

Аслини олганда жамиятимизнинг энг меҳнаткаш, фидойи инсонлари бу Сизларсиз. Чунки ҳаммамизни ер боқади, кийинтиради. Шунинг учун ҳам ерга нисбатан “она ер” дея таъриф берилади. Дастурхонимиз тўкинлиги, бозорларимиз гавжумлиги Сизларнинг шарофатингиз, хизматингиз билан, десам адашмайман.

Бугун кўп минг сонли касаба уюшмалари аъзолари орасида қишлоқ хўжалиги ходимлари, фермер ва томорқачиларнинг борлиги барчамизга фахр-ифтихор бағишлайди. Ҳозирда Агросаноат мажмуи ходимлари касаба уюшмаси томонидан ҳам деҳқонларимизнинг саломатликларини мустаҳкамлаш мақсадида санаторийларда дам олишларига кўмаклашилмоқда.

Азиз дўстлар!
Фидойи деҳқонлар, қишлоқ хўжалиги ходимлари!

Аҳолимизнинг озиқ-овқат маҳсулотига бўлган эҳтиёжини қондириш, бозорларимиз тўкинлигини, нархларнинг барқарорлигинии таъминлашда деҳқон ва фермерларимизнинг ҳиссаси катта.

Фурсатдан фойдаланиб, қишлоқ хўжалиги соҳасининг барча жонкуяр ходимларини, соҳага алоқадор ташкилотлар ва корхоналар раҳбарлари, ишчи-ходимларини қишлоқ хўжалиги ходимлари куни билан самимий муборакбод этамиз.

Байрамингиз муборак бўлсин!

Э.Нуралиев,
Ўзбекистон касаба уюшмалари Федерациясининг Фарғона вилоят Кенгаши раиси