“Zakovat”da “Navo” jamoasi Kasaba uyushma kubogini qoʻlga kiritdi

11 noyabr — Oʻzbekiston kasaba uyushmalari kuni munosabati bilan yoshlar va mehnat jamoalarida turli bayram tadbirlari tashkil etib kelinmoqda.

Xususan, Madaniyat, sport va turizm xodimlari kasaba uyushmasi Fargʻona viloyati birlashgan qoʻmitasi tashabbusi bilan Oʻzbekiston kasaba uyushmalari Federasiyasining Fargʻona viloyati Kengashi hamkorligida Oʻzbekiston davlat san’at va madaniyat institutining Fargʻona mintaqaviy filiali talabalari oʻrtasida “Kasaba uyushma kubogi” uchun “Zakovat” intellektual oʻyini oʻtkazildi.

Unda oliygoh fakultetlarida tahsil olayotgan talabalari 5 ta jamoaga boʻlinib, gʻoliblik uchun kurash olib bordilar.

— Oliy oʻquv yurtlarida tahsil olayotgan talabalar orasidan iqtidorli yoshlarni aniqlash, ularning intellektual salohiyatini yuksaltirish, bilimini mustahkamlash maqsadida tashkil etilgan “Zakovat” intellektual oʻyini haqiqiy bilimlar bellashuviga aylandi, — deydi Madaniyat, sport va turizm xodimlari kasaba uyushmasi Fargʻona viloyati birlashgan qoʻmitasi raisi Manzuraxon Akramova. — Kasaba uyushmalari kuni bayrami munosabati bilan tashkil etilgan bilimlar bellashuvi oliygoh talabalarida katta taassurot qoldirdi. Ayniqsa, talaba yoshlarning berilgan savollarga aniq va tezkorlik bilan javob berishi, ularning koʻplab bilimga ega ekanligidan dalolat berdi.

“Zakovat” oʻyinida jamolarga 20 ta savol berildi. Toʻgʻri javob topgan jamoalar yakunda gʻalaba qozondi.

Oliygohning “Navo” jamoasi berilgan savollarga eng koʻp toʻgʻri javob berib, “Kasaba uyushma kubogi”ni qoʻlga kiritdi. “Aktrisalar” jamoasi 2-, “Maqomchilar” jamoasi 3-oʻrinni qoʻlga kiritdi. “Suxandonlar”, “Yosh kitobxon” jamoalari sovrindorlar safidan oʻrin egalladi.

— Kasaba uyushmalari kuni munosabati bilan tashkil etilgan “Zakovat” intellektual oʻyinida bilimlarimizni mustahkamlab, koʻplab qiziqarli ma’lumotlarga ega boʻldik. Biz “Navo” jamoasi ushbu intellektual oʻyinda gʻoliblikni qoʻlga kiritib, “Kasaba uyushma kubogi”ni qoʻlga kiritdik. Bundan behad hursandmiz, — deydi jamoa a’zosi Mushtariy Xudoyberdieva.

Gʻolib va barcha ishtirokchilarga Madaniyat, sport va turizm xodimlari kasaba uyushmasi Fargʻona viloyati birlashgan qoʻmitasi tomonidan esdalik sovgʻalari topshirildi.

O‘zbekiston kasaba uyushmalari Federatsiyasining Farg‘ona viloyati Kengashi.