Спорт — мустаҳкам оиламиз пойдевори

Фарғона ихтисослаштирилган олимпия захиралари мактаб-интернатида таълим,фан ва маданият ходимлари касаба уюшмаси томонидан тизимда меҳнат қилаётган ходимлар ҳамда уларнинг оила аъзолари ўртасида “Спорт — мустаҳкам оиламиз пойдевори” шиори остидаги спартакиаданинг вилоят босқичи бўлиб ўтди. Мазкур мусобақада туман ва шаҳар босқичида ғолиб чиққан оилалар иштирок этди. Спорт мусобақасида оилалар югуриш, акробатика ва тўпни нишонга отиш, моҳир ҳужумчи, “овчилар ва қуёнлар” ўйини, “қаддимизни ростлаймиз, сакрашни бошлаймиз”, “чаққонлик ва мерганлик” эстафетаси ҳамда арқон тортиш шартларини бажардилар. Бу каби спорт мусобақаларини ўтказишдан мақсадимиз ходимлар ва уларнинг оила аъзоларини спорт билан мунтазам шуғулланишга жалб қилиш, улар ўртасида соғлом турмуш тарзини шакллантириш, оилалар бирдамлигини таъминлаш, қолаверса, таълим ходимлари ўртасида ўзаро ҳамжиҳатликни мустаҳкамлашдан иборат, — дейди Таълим, фан ва маданият ходимлари касаба уюшмаси республика Кенгашининг Фарғона вилояти бўйича масъул ташкилотчиси Лолахон Аҳмедова. Иштирокчилар ғалаба сари ишонч билан ҳаракат қилдилар. Мусобақада ота-оналари қатори фарзандлари ҳам шартларни бажаришда камчиликларга йўл қўймасликка интилишди. Шиддатли ва қизғин кечган мусобақанинг якуний натижасига кўра, барча шартларни маҳорат билан бажарган Бешариқлик Абдусаломовлар оиласи биринчи ўринни эгаллаб, республика босқичига йўлланмани қўлга киритди. Иккинчи ўринга Бағдодлик Маматқуловлар оиласи, учинчи ўринга эса Қўқонлик Усмоновлар оиласи муносиб деб топилди. Ўтган йили оиламиз билан иккинчи ўринни эгаллагандик. Бу бизга яхшигина сабоқ бўлганди. Шунинг учун мазкур мусобақага астойдил тайёрландик. Машғулотларнинг натижаси ўлароқ, бугун биринчи ўринни қўлга киритдик. Ниятимиз, Республика босқичида ҳам ғолиб бўлиш, — дейди мусобақанинг биринчи ўрин соҳиби Абдували Абдусаломов.Шунингдек, мусобақа иштирокчилари “Энг чаққон оила”, “Ғалабага бўлган интилиши юксак оила”, “Фаол иштирок этган оила” номинациялари бўйича ҳам тақдирландилар.Мусобақа ғолиблари ва фаол иштирокчилар вилоят касаба уюшмалари ташкилотлари бирлашмасининг Диплом ва эсдалик совғалари билан тақдирландилар.