“Sog‘lom tanda – sifatli ta’lim” shiori ostida sport musobaqalari o‘tkazildi

Uchko‘prik tumanidagi 15-maktabda “Besh tashabbus olimpiadasi” doirasida umumiy o‘rta ta’lim maktablari o‘qituvchi-murabbiylari o‘rtasida Kasaba uyushmasi kubogi uchun sport musobaqalari o‘tkazildi.

Musobaqaning ochilish marosimida tumanda jismoniy tarbiya va sportni rivojlantirish, aholi, ayniqsa, ayollarni sport bilan muntazam shug‘ullanishlari uchun keng imkoniyatlar yaratib berishga alohida e’tibor qaratilayotgani ta’kidlandi.

“Sog‘lom tanda – sifatli ta’lim” shiori ostida o‘tkazilgan musobaqada sportning voleybol, mini futbol, shaxmat, shashka va stol tennisi turlari bo‘yicha 600 nafardan ziyod o‘qituvchi-murabbiylar bellashdi.

Musobaqalar yakunida, g‘olib va sovrindorlarga tashkilotchilarning diplom hamda esdalik sovg‘alari topshirildi.

Gʻoliblikni qo‘lga kiritgan 9-, 19-, 21-, 28-, 33-, 34- va 56-umumiy o‘rta ta’lim maktablari sport jamoalari musobaqalarning viloyat bosqichida ishtirok etadi.