Maqsad – xotin-qizlarni hayotdan rozi qilish

Muhtaram Yurtboshimiz tashabbusi bilan joriy etilgan “Ayollar daftari” tizimi boshqa hech bir mamlakatda uchramaydigan noyob mexanizm bo‘lib, bu orqali yurtimiz xotin-qizlarini qiynab kelayotgan muammolar hal etilishiga erishilmoqda. Natijada jamiyatimizda muhim o‘rin tutuvchi opa-singillarimizning turmush farovonligi oshirilib, hayotdan rozi bo‘lib yashashlariga zamin yaratilmoqda.

O‘zbekiston kasaba uyushmalari Federatsiyasining Farg‘ona viloyati Kengashida “Ayollar daftari” tizimining 5-bosqichi yuzasidan Jamoatchilik nazoratini o‘rnatish bo‘yicha Farg‘ona viloyatiga biriktirilgan vakil – viloyat shtabi rahbari A.Salixov hamda Farg‘ona viloyati hokimi o‘rinbosari – Oila va Xotin-qizlar boshqarmasi boshlig‘i K.Kavlonova rahbarligida o‘tkazilgan yig‘ilish ham aynan “Ayollar daftari” tizimi ijrosini sifatli bajarish masalasiga bag‘ishlandi.

Yig‘ilishda viloyat studiyasi orqali tuman-shaharlarga biriktirilgan mas’ullar, Kengash apparati xodimlari va Tarmoq kasaba uyushmalarining viloyat kengashlari rahbarlari hamda hududiy studiyalari orqali tuman-shahar hokimlarining o‘rinbosarlari – Oila va Xotin-qizlar bo‘limi boshliqlari, kasaba uyushmalarining tuman-shahar Kengashlari raislari ishtirok etdi.

– “Ayollar daftari” ijtimoiy ahvoli va turmush sharoiti og‘ir, ishsiz va ijtimoiy faol bo‘lmagan xotin-qizlarni har tomonlama qo‘llab-quvvatlash va himoya qilish, ularga davlat tomonidan manzilli tarzda ko‘maklashish bo‘yicha aniq tizimdir. Bugungi kunda kambag‘allikni qisqartirish, ishsizlikning oldini olish masalalari dolzarb bo‘lib turibdi. Shunday ekan, ijtimoiy himoyaga muhtoj xotin-qizlarni qo‘llab-quvvatlasak, albatta, ular hayotdan rozi bo‘lishadi. Bu orqali Prezidentimiz olib borayotgan hayotbaxsh islohotlarni fuqarolarimiz o‘z hayotlarida sezadi, – dedi yig‘ilishni boshqarib borgan viloyat shtabi rahbari A.Salixov.

Tahliliy-tanqidiy o‘tkazilgan yig‘ilishda Farg‘ona viloyatida «Ayollar daftari»ning 5-bosqichini tez fursatlarda sifatli bajarish va uning haqqoniyligiga alohida e’tibor qaratish zarurligi ta’kidlandi.

O‘zbekiston kasaba uyushmalari Federatsiyasining Farg‘ona viloyati Kengashi.