“Bir bo‘lsak – yagona xalqmiz, birlashsak – Vatanmiz!”

O‘zbekiston Respublikasi Davlat Mustaqilligining 33 yilligi munosabati bilan “Bir bo‘lsak – yagona xalqmiz, birlashsak – Vatanmiz!” shiori ostida Farg‘ona viloyatidagi mehnat jamoalarida ham turli ma’naviy-ma’rifiy va sport tadbirlari, tarixiy shahar va ziyoratgohlarga sayoxatlar tashkil etilmoqda.

Ana shunday tadbirlardan biri O‘zbekiston kasaba uyushmalari Federatsiyasining Farg‘ona viloyati Kengashi tomonidan “Ahmad Al-Farg‘oniy” dam olish uyida tashkillanib, unda ishchi-xodimlar o‘rtasida sport spartakiadasi o‘tkazildi.  

Viloyatdagi korxona va tashkilotlarda mehnat qilib kelayotgan 140 nafarga yaqin ishchi-xodimlar shaxmat, shashka, stol tennisi, futbol, dars va suzish kabi sport turlari bo‘yicha o‘zaro bellashdilar. 

Musobaqa bellashuvlari ancha qizg‘in kechdi. Har bir ishtirokchi g‘oliblik uchun astoydil harakat qildi. Ishtirokchilarni musobaqaga jiddiy tayyorgarlik ko‘rgani maydonda yaqqol bilindi. 

Yakunda esa g‘oliblik kuchlilarga nasib etdi. Jamoaviy baxsda futbol musobaqasida 1-o‘rin “UzSungwoo” MCHJ qo‘shma korxonasi yigitlariga nasib qilgan bo‘lsa, aql gimnastikasi hisoblangan shaxmat musobaqasida ayollar o‘rtasidagi baxsda “Avtooyna” MCHJ ishchisi Nigora Mamajonova raqiblaridan kuchli ekanligini isbotladi. 

— Men ushbu spartakiadada stol tennisi musobaqasida birinchilikni qo‘lga kiritdim. Bundan juda ham hursandman, — deydi “Med oil metan” MCHJ sharafini himoya qilgan Abdullox Abdullayev. — Chunki, bu musobaqada birinchi bor ishtirok etishim edi. 

“Avtooyna” MCHJning yana bir xodimi Zulayho Zubaydullayeva ayollar o‘rtasida o‘tkazilgan stol tennisi musobaqasida tengsizligini namoyish etib, g‘olibga aylandi.

— Musobaqada g‘olib bo‘lganim bejizga emas. Sababi ish joyimda erkaklar qatori, ayollarning sport bilan shug‘ullanishlari uchun barcha sharoitlar yaratilgan. Bu biz uchun har tomonlama foydali bo‘lmoqda, — deydi “Avtooyna” MCHJ xaridlar bo‘limi mutaxassisi Zulayho Zubaydullayeva.