O‘quv-seminarda kerakli ma’lumotlarga ega bo‘ldik

Bu yil kasaba uyushmalarida sarhisob yili. Bunda o‘tgan besh yillik faoliyatga baho beriladi. O‘tgan davr mobaynida kasaba uyushma qo‘mitasi tomonidan qanday ishlar amalga oshirildi, a’zolar manfaati qay darajada himoya qilindi? Bularni barchasi hisobot davrida ma’lum bo‘ladi. 

O‘zbekiston transport, yo‘l va kapital qurilish, qurilish industriyasi xodimlari kasaba uyushmasi Farg‘ona viloyati Kengashi tasarrufida birlashgan tashkilotlar yetakchilari ishtirokida hisobot-saylovlarni o‘tkazish bo‘yicha o‘quv-seminari tashkil etildi.

Unda hisobot-saylov konferensiyasini olib borish, boshlang‘ich kasaba uyushma qo‘mitasi raisi va tarkibini saylash, viloyat Konferensiyasiga delegatlarni hamda taftish komissiyasi raisi tarkibini saylashgacha bo‘lgan jarayonlar amaliy tarzda ko‘rsatib o‘tildi.

— Darhaqiqat, bu yil sinov yili. Chunki o‘tgan besh yillik faoliyatga baho beriladi, — deydi Quva tuman yo‘llardan foydalanish davlat muassasasi kasaba uyushma qo‘mitasi raisi Nodiraxon Toshpo‘latova. — O‘quv amaliy seminarda hisobot-saylovlarni o‘tkazish jarayonlari batafsil tushuntirib berildi. Ta’kidlanganidek, bu safargi hisobot-saylovi avvalgilaridan farq qiladi. Seminarda bu jihatlarga alohida urg‘u berildi. O‘quv seminar davomida bu haqda to‘liq ma’lumotga ega bo‘ldik.

Shuningdek, O‘zbekiston kasaba uyushmalari Federatsiyasi Farg‘ona viloyati kengashi raisi Erkinjon Nuraliyev, Kengash raisining o‘rinbosari Abrorjon Otaboyev va Transport, yo‘l va kapital qurilish, qurilish industriyasi xodimlari kasaba uyushmasi Farg‘ona viloyati Kengashi raisi Zohidjon Qodirov seminar ishtirokchilari tomonidan hisobot-saylovlarni o‘tkazish bo‘yicha berilgan savollariga javob qaytardilar.

Seminarda Transport, yo‘l va kapital qurilish, qurilish industriyasi xodimlari kasaba uyushmasi Respublika Kengashi masʼul xodimi Dildora Hashimova ishtirok etdi.

O‘zbekiston kasaba uyushmalari Federatsiyasining Farg‘ona viloyati Kengashi.