Касб байрами олдидан тармоқ спартакиадаси ўтказилди

Қурилиш соҳаси ходимлари куни байрами муносабати билан Ўзбекистон транспорт, йўл ва капитал қурилиш, қурилиш индустрияси ходимлари касаба уюшмалари Фарғона вилоят бирлашган касаба уюшма қўмитаси томонидан «Арсиф» дам олиш масканида тармоқ спартакиадаси ўтказилди. Унда ишчи-ходимлар турли спорт йўналишлари бўйича беллашдилар.

Шуни алоҳида таъкидлаш ўринлики, ҳаётимизнинг барча соҳа ва тармоқларида катта қурилиш ва ободонлаштириш ишлари жадал олиб борилмоқда. Мамлакатимиз улкан қурилиш майдонига айланган ҳозирги кунда соҳа ходимларининг масъулиятли ва шарафли меҳнати таҳсинга сазовордир.

Президентимиз таъбири билан айтганда, мамлакатимиз равнақи, халқимиз фаровонлигини таъминлашда мазкур соҳа ходимлари – моҳир қурувчи ва меъморлар, механик ва мураккаб техникаларни бошқараётган инсонлар, лойиҳачи ва дизайнерлар, қурилиш саноати вакиллари ва пудратчиларнинг меҳнати ҳамиша муҳим ўрин тутиб келади.

Спартакиада ғолибларини тақлирлаш маросимида сўз олганлар йиғилганларни касб байрами билан табриклаб, уларга узоқ умр, мустаҳкам соғлик, келгуси ишларига омадлар тиладилар.

Ғолиб ва фаол иштирокчиларга ташкилотчилар томонидан эсдалик совғалари топширилди.