“Менинг Президентим” ижодий ишлар танловининг вилоят босқичи ғолиблар аниқланди.

Ўзбекистон халқ таълими вазирлиги ҳамда Ўзбекистон касаба уюшмалари Федерацияси билан ҳамкорлигида мактабларнинг 10-11 синф ўқувчилари ўртасида сўнгги йилларда юртимизда амалга оширилган ислоҳотларни теран идрок этиш ва улар тўғрисида мулоҳаза юритиш кўникмаларини, Ватанимиз тақдири, эртанги куни ва истиқболига дахлдорлик туйғусини ривожлантириш, уларда ижодий, танқидий, ностандарт фикрлаш, нотиқлик, мослашувчанлик, ўз фикрини ижодкорона етказиб бера олиш кўникмаларини шакллантириш мақсадида “Менинг Президентим” ижодий ишлар танлови ташкил қилинди.

Танловнинг биринчи босқичи вилоятимиздаги 934 та мактабда ташкил этилиб, унда 3282 та 10-11 синфлардаги 74017 нафар ўқувчилар иштирок этди. Иштирокчилар “Янги Ўзбекистон мени нигоҳимда” мавзусида эссе ёзишиб, энг юқори балларни қўлга киритган 919 нафар ўқувчилар танловнинг туман, шаҳар босқичида иштирок этиш ҳуқуқини қўлга киритди. Иккинчи босқич 6-11 декабрь кунлари ташкил этилиб, унда мактабларда ғолибликни қўлга киритган 919 нафар ўқувчилар “Янги Ўзбекистон – янги имкониятлар” мавзусида иншо ёзишди. Энг юқори балларни қўлга киритган 19 нафар ўқувчилар танловнинг вилоят босқичида иштирок этадиган бўлишди.

Жорий йилнинг 17 декабрь куни Ўзбекистон касаба уюшмалари Федерациясининг Фарғона вилоят Кенгаши биносида танловнинг вилоят босқичи ташкил этилди. Танловнинг вилоят босқичи шартига асосан ўқувчилар “Менинг Президентим” мавзусида тақдимот тайёрлашиб, уни ҳимоя қилиб беришди. Танловнинг шаффофлиги ва адолатлигини таъминлаш мақсадида жараёнлар ижтимоий тармоқлар орқали тўғридан-тўғри намойиш этиб борилди.

Якуний натижаларга 1 ўрин – Сўх туманидаги 2-ихтисослаштирилган давлат умумтаълим мактаби 10-синф ўқувчиси Султонбоев Асадбек Улуғжон ўғли, 2 ўрин – Ўзбекистон туманидаги 65-ихтисослаштирилган давлат умумтаълим мактаби 10-синф ўқувчиси  Камолиддинова Мадинахон Нодиржон қизи, 3 ўрин – Фурқат туманидаги 34-ихтисослаштирилган давлат умумтаълим мактаби 11-синф ўқувчиси Рустамова Рухшонахон Отабек қизига насиб этди.

Танлов ғолиблари ва фаол иштирок этган ўқувчилар диплом ва эсдалик совғалари билан тақдирландилар.

Ўзбекистон касаба уюшмалари Федерациясининг Фарғона вилоят Кенгаши