Байрам тадбири ташкил этилди

Ўзбекистон Республикаси Президенти томонидан 2020 йил 23 ноябрь куни имзоланган Қонунга асосан “11 ноябрь – Ўзбекистон касаба уюшмалари куни” этиб белгиланган бўлиб, бугунги кунда мамлакатимизнинг барча жойларида ушбу санага бағишлаб турли тадбирлар ташкил этиб келинмоқда.

Ўзбекистон касаба уюшмалари Федерациясининг Фарғона вилоят Кенгаши томонидан Фарғона шаҳридаги “Сарбон” тантаналар саройида 11 ноябрь – Ўзбекистон касаба уюшмалари куни муносабати билан “Юрт тараққиёти йўлида бирлашайлик” шиори остида байрам тадбири ташкил этилди.

Тадбирда Ўзбекистон касаба уюшмалари Федерацияси раисининг ўринбосари Қ.Қирғизалиев, Фарғона вилояти ҳокими Х.Бозаров, вилоят сектор раҳбарлари, бошқарма, ташкилотлар, касаба уюшмалари ходимлари ва фаоллари иштирок этишди.

Таъкидланганидек, ўтган даврда касаба уюшмалари томонидан ишчи-ходимларни қўллаб-қувватлаш, уларнинг муаммоларини ҳал қилиш борасида кўплаб ижобий ишлар амалга оширилди. Айниқса, сўнги йилларда касаба уюшмалари жамиятимизнинг муҳим бир бўлагига айланганини вилоятимиз мисолида кўришимиз мумкин десак муболаға бўлмайди.

Бугунги кунда вилоятимизда касаба уюшмалари тизимида 3,5 мингдан ортиқ бошланғич ташкилотларда 462 мингдан зиёд фаоллар фидокорона меҳнат қилмоқдалар. Асосийси, касаба уюшмалари томонидан вилоятимиздаги корхона ва ташкилотларда ишчи-ходимларни касбий, меҳнатга оид, ижтимоий-иқтисодий ҳуқуқ ва манфаатларини таъминлашга, муносиб меҳнат шароитларини яратишда фаол иштирок этиб келмоқдалар.

Байрам тадбирида Ўзбекистон касаба уюшмалари Федерацияси томонидан эълон қилинган “Энг яхши сектор раҳбари”, “Энг яхши маҳалла фуқаролар йиғини раиси”, “Энг яхши аёл иш берувчи”, “Касаба уюшмалари лауерати мукофоти” ва бошқа турли танловларнинг ғолиблари диплом ва пул мукофотлари билан тақдирландилар.

Шунингдек, тадбирда 82 нафар касаба уюшмалари фаоллари, ҳамкор ташкилотлар вакиллари Ўзбекистон касаба уюшмалари Федерациясининг “Касаба уюшмалари кунига 1 йил” кўкрак нишони билан тақдирландилар.

Байрам тадбири якунида концерт дастури намойиш этилди. 

Ўзбекистон касаба уюшмалари Федерациясининг Фарғона вилоят Кенгаши