Спортчи тарбиячилар беллашуви

Таълим, фан ва маданият ходимлари Фарғона шаҳар Кенгаши 2017 йил “Халқ билан мулоқот ва инсон манфаатлари йили” дастурида белгиланган вазифаларни ўз вақтида амалга ошириб келмоқда.

Кенгаш ҳамкор ташкилотлар билан мустаҳкам алоқа ўрнатган. Бу борада бошланғич касаба уюшма ташкилотлари етакчилари билан бамаслаҳат иш юритиб, кўпчиликнинг ҳурмат-эътиборига сазовор бўлмоқда. Яқинда шаҳар мактабгача таълим бўлими билан ҳамкорликда ходимлар ўртасида оммавий спорт мусобақалари уюштирилди. Ўзбекистон Республикаси Конституцияси қабул қилинганлигининг 25 йиллиги муносабати билан шаҳардаги 1-умумтаълим мактабида боғча тарбиячилари ва ходимларидан 250 нафари иштирокида спортнинг 5 та тури бўйича беллашувлар ўтказилди. Мусобақага пухта ҳозирлик кўрилганлиги унинг тартибли ва қизиқарли ўтишини таъминлади. Шаҳар мактабгача таълим бўлими мудири Насибахон Ахмедова барчани Конституция байрами билан табриклаб, мусобақада омад тилади. Бир-биридан кучли ва чаққон йигит-қизлар мусобақа шартларини чиройли бажардилар. Фахрий ўринларга 1, 13, 37, 38, 46, 62-мактабгача таълим муассасалари спорт жамоалари эга бўлишди. Ғолибларга бўлим ва кенгаш томонидан эсдалик совғалари топширилди.