Янги Ўзбекистон менинг тасаввуримда

Фарғона давлат университетида “Янги Ўзбекистонни ўзимиз, ўз қўлларимиз билан бунёд этамиз!” шиори остида республика эсселар танловининг вилоят босқичи бўлиб ўтди.

Унда олийгоҳларда ўтказилган танловда муваффақият қозонган ва ғолиб деб топилган 33 нафар талабалар иштирок этиб, “Янги Ўзбекистон менинг тасаввуримда” мавзусида ўз ижодий ишларини ҳакамлар хайъатига тақдим этишди.

Қайд этиш жоизки, “Янги Ўзбекистонни ўзимиз, ўз қўлларимиз билан бунёд этамиз!” шиори остида бўлиб ўтган республика эсселар танловининг биринчи босқичида 4 минг 852 нафар талабалар иштирок этди. Уларнинг 626 нафари танловнинг иккинчи босқичида иштирок этиш учун ғолиб деб топилди. Вилоят босқичига эса уларнинг 33 нафари етиб келди.

— “Янги Ўзбекистонни ўзимиз, ўз қўлларимиз билан бунёд этамиз!” шиори остидаги ушбу нуфузли танлов Фарғона вилоятидаги олий таълим муассасаларида таҳсил олаётган ижодкор-талабаларда катта қизиқиш уйғотди, — дейди Таълим ва фан ходимлари касаба уюшмаси Республика кенгашининг Фарғона вилояти бўйича масъул ташкилотчиси Лолахон Аҳмедова. — Улар ёзган есселарида, бугунги ўзгаришлар, янгиланишлар, юртимиз бўйлаб амалга оширилаётган кенг кўламли ислоҳотлар, амалга оширилаётган бунёдкорлик ишларини кўрсатиб беришган. Ўйлайманки, танлов кўплаб умидли ёшларни кашф этди.

Албатта, ғолибларни танлаб олиш ҳакамлар хайъатига учун осон бўлмади. Танлов иштирокчиларини баҳолаб борган ҳакамлар хайъатининг қарорига кўра, 1-ўринни Фарғона давлат университети талабаси Осиё Хошимова қўлга киритди. Ўзбекистон-Корея Халқаро университети талабаси Мадинабону Рўзиева 2-ўринни, Қўқон давлат педагогика институти талабаси Наврўзахон Турсунова 3-ўринни эгаллаб, танловнинг республика босқичида иштирок этиш йўлланмасини қўлга киритдилар.   

— Ғолиб бўлиб, республика босқичига чиққанимдан жудаям хурсандман, — дейди танловнинг 1-ўрин соҳибиси Фарғона давлат университети талабаси Осиё Хошимова. — Мазкур танлов истеъдодимизни намойиш этиш катта имконият бўлди. Насиб этса, республика босқичида ҳам Фарғона вилояти шарафини муносиб ҳимоя қиламан.

  Ғолибларга Ўзбекистон касаба уюшмалари Федерацияси Фарғона вилояти кенгашининг эсдалик совғалари топширилди.