СЎХЛИК АЁЛЛАРГА ЭҲТИРОМ КЎРСАТИЛДИ

Халқаро Қишлоқ аёллари куни байрамини юқори уюшқоқликда ўтказиш бўйича Фарғона вилояти ҳокимлиги томонидан тузилган чора-тадбирларга асосан Ўзбекистон касаба уюшмалари Федерациясининг Фарғона вилояти Кенгашига Сўх тумани бириктирилган эди.

Сана муносабати билан Ўзбекистон касаба уюшмалари Федерациясининг Фарғона вилояти Кенгаши томонидан Сўх туманида турли маънавий-маърифий тадбирлар ўтказилиб, аёлларга ҳурмат-эҳтиром кўрсатилмоқда.

Хусусан, 25 нафар Сўхлик аёлларнинг Фарғонанинг диққатга сазовор жойларига саёхатлари уюштирилди. Улар Фарғона вилояти тарихи ва маданияти Давлат музейида бўлиб, музей фаолияти билан танишдилар.

Музей фондининг асосий қисмини 19-асрнинг иккинчи ярмидан ҳозирги кунгача бўлган Фарғона водийси аҳолиси ҳаётини акс эттирувчи фотосуратлар ва ҳужжатлар, шунингдек, халқимизнинг қадимий ва янги тарихига оид моддий мерос объектлари ташкил этади. Сўхлик аёлларда музей фаолияти ва у ерда ўрин олган экспонатлар катта таассурот қолдирди.

Шунингдек, улар 2014 йилда қурилган Ислом Каримов номидаги Театр-концерт саройида ҳам бўлдилар.

– Минг ўринли санъат саройи миллий ва замонавий меъморчилик анъаналарини ўзида уйғунлаштиргани ҳамда эшик ва устунлари шарқона нақшлар билан безатилгани бизда катта таассурот қолдирди, – дейди Майрамхон Алибоева.

Сўх туманидан ташриф буюрган қишлоқ аёлларининг мароқли ҳордиқ чиқаришлари учун Қувасой шаҳридаги “Аҳмад Ал-Фарғоний дам олиш уйи”да спортнинг шашка тури бўйича мусобақа ташкил этилди. Ҳар жабҳада фаол бўлган аёллар шашка ўйинида ҳам ўзларининг фаолликларини намоён этдилар. Бундан ташқари, уларнинг мароқли ҳордиқ чиқаришлари учун концерт дастури ҳам ташкил этилди.

Унда Ўзбекистон касаба уюшмалари Федерациясининг Фарғона вилояти Кенгаши раиси ўринбосари Орзигул Қозихонова иштирок этиб аёлларни яқинлашиб келаётган Халқаро қишлоқ аёллари куни билан табриклаб, уларга узоқ умр ва мустаҳкам соғлиқ тилади.

Концерт дастурида Сўхлик аёллар Ватанни, тинчликни ва мустақилликни мадҳ этувчи қўшиқларга рақс тушиб, мароқли дам олдилар.

Бир сўз билан айтганда, Сўх туманидаги аёлларга кўрсатилаётган ҳурмат-эҳтиромдан уларнинг юзларида мамнунлик ва шукроналик ҳисса зоҳирдир.

Шоҳсултон Тўхтаматов,

журналист.