Муносибларга автомобил совға қилинди

Ўзбекистон Республикаси Президенти ташаббуси билан Фарғона вилоятининг Сўх туманида Ўзбекистон касаба уюшмалари Федерацияси томонидан барпо этилган “Сўх” номли замонавий болалар соғломлаштириш оромгоҳининг тантанали очилиш маросимида Президентимиз ташаббуслари билан жорий йилнинг май ойида касаба уюшмалари Федерацияси раиси мутасаддилигидаги хотин-қизлар муаммоларини тизимли ҳал этиш, уларни ижтимоий қўллаб-қувватлаш бўйича республика комиссияси томонидан Фарғона вилоятининг Сўх туманидаги 27 маҳалла, Фарғона туманидаги Шоҳимардон ва Ёрдон маҳаллалари ҳамда Риштон туманининг Чўнғара маҳалласидаги масъуллар ўртасида ташкил этилган “Энг яхши маҳалла раиси”, “Энг яхши сектор раҳбари”, “Энг яхши хотин-қизлар фаоли”, “Энг яхши ёшлар етакчиси”, “Энг яхши ҳоким ёрдамчиси” танловларнинг Сўх тумани бўйича ғолибларини тақдирлаш тадбирига уланиб кетди.

“Энг яхши маҳалла раиси”, “Энг яхши хотин-қизлар фаоли”, “Энг яхши ёшлар етакчиси”, “Энг яхши ҳоким ёрдамчиси” танловларида 3-ўринни қўлга киритган ғолибларнинг ҳар бирига диплом ва 20 млн. сўмдан пул мукофотлари, 2-ўринни эгаллаган иштирокчиларнинг ҳар бирига диплом ва 30 млн. сўмдан пул мукофотлари топширилди.

“Энг яхши маҳалла раиси”, “Энг яхши сектор раҳбари”, “Энг яхши хотин-қизлар фаоли”, “Энг яхши ёшлар етакчиси”, “Энг яхши ҳоким ёрдамчиси” танловларида 1-ўринни қўлга киритган ғолибларнинг ҳар бирига диплом ва Президент совғаси автомобиллар калитлари тантанали равишда топширилди.

Танлов натижаларига кўра, Сўх тумани 2-сектор раҳбари Садирали Мирзокаримов “Энг яхши сектор раҳбари” танлови ғолиб деб топилди. Танлов ғолибига Президент совғаси “Жентра” автомобили, “Энг яхши маҳалла раиси” танловида 1-ўринни эгаллаган Сўх тумани “Қалъача” МФЙ раиси Фаёзиддин Тожиддиновга “Нексия 3” автомашинаси, “Энг яхши ҳоким ёрдамчиси” танловида 1-ўринни қўлга киритган Сўх туманининг “Ровон” МФЙда ишлаб келаётган Илхомжон Икромовга “Кобальт” автомашинаси, “Энг яхши хотин-қизлар фаоли” танловида 1-ўринни эгаллаган “Чумоқча” МФЙ ходимаси Наргиза Дадахоновага “Спарк”, “Энг яхши ёшлар етакчиси” танловида ғолибликни қўлга киритган “Шарқобод” МФЙ ёшлар етакчиси Шохжаҳон Раҳимбердиевга “Спарк” автомобили совға қилинди.