ИШЧИ-ХОДИМЛАР МАНФААТИ – ДОИМИЙ ЭЪТИБОРДА

Бир неча йилдан буён вилоятимизда фаолият юритиб келаётган “Uz Dong Yang-Fargona” МЧЖ «GM-O`zbekiston» заводи томонидан ишлаб чиқарилаётган бир қатор автомобилларга 40 турдан ортиқ эҳтиёт қисмларини етказиб беради.

Бу ерда бугунги кунда 50 нафардан зиёд ишчи-ходимлар фаолият юритади. Улар “Ўзметмашсаноат” касаба уюшмаси Республика кенгашининг Фарғона вилояти кенгаши таркибида бирлашган.

Куни-кеча Ўзбекистон касаба уюшмалари Федерациясининг Фарғона вилояти Кенгаши раиси Эркинжон Нуралиев “Uz Dong Yang Fargona” МЧЖда бўлиб, корхона директори Шерзоджон Халилов ва ишчи-ходимлар билан суҳбатлашди.

Корхонада жамоа шартномасининг барча бандлари тўлиқ бажарилиб, ишчилар учун етарли шарт-шароитлар муҳайё этилган. Эркинжон Нуралиев Шерзоджон Халилов билан суҳбатлашаркан, касаба уюшмаларининг бош мақсади – ишчи-ходимларга доимо камарбаста ва елкадош бўлиш, аъзоларни моддий ва маънавий, ижтимоий жиҳатдан қўллаб-қувватлаш эканини алоҳида таъкидлади.

“Uz Dong Yang Fargona” МЧЖ томонидан ишчилар манфаати ҳамиша устун қўйилиб, уларни қўллаб-қувватлаб келаётгани учун миннатдорлик билдирилди. Шунингдек, 2023 йилда ҳам яқин ҳамкорликдаги ишларни янада ривожлантириш, ишчи-ходимларнинг қонуний манфаатларини ҳимоя қилиш, уларни ва фарзандларини соғломлаштириш ишларига алоҳида эътибор қаратиш бўйича фикр алмашилди.

Тойир Ҳомидов,

“Ўзметмашсаноат” касаба уюшмаси Республика кенгашининг Фарғона илояти масъул ташкилотчиси.